(ភ្នំពេញ) : អាស្រ័យដោយស្ថានភាពនៃការរីករាលដាលនៃជំងឺកូវីដ-១៩ ក្នុងរយៈពេលប៉ុន្មានថ្ងៃនេះ មានបងប្អូនអាជីវករ និងប្រជាពលរដ្ឋបានឆ្លងវីរុសកូវីដ-១៩ ក្នុង "ព្រឹត្តិការណ៍សហគមន៍២០ កុម្ភៈ ២០២១” ដែលស្ថានភាពនេះ បានឆ្លងរាលដាលយ៉ាងឆាប់រហ័សគួរឲ្យព្រួយបារម្ភ និងចាំបាច់ត្រូវមានវិធានការសុខាភិបាល រដ្ឋបាលខណ្ឌឫស្សីកែវ បានសម្រេចជាបន្ទាន់ផ្អាកដំណើរការបណ្តោះអាសន្នមូលដ្ឋានផ្សារងិនអាន(ផ្សារទំនប់) ក្នុងសង្កាត់ទួលសង្កែទី១ សម្រាប់រយះពេល ១៤ថ្ងៃ គិតចាប់ថ្ងៃទី២២ ខៃមេសា ឆ្នាំ២០២១ រហូតដល់ថ្ងៃទី៥ ខែឧសភា ឆ្នាំ២០២១។

ការផ្អាកបណ្តោះអាសន្នខាងទីតាំងខាងលើនេះ ដើម្បីបង្ការ និងទប់ស្កាត់ការឆ្លងរីករាលដាលវីរុសកូវីដ-១៩ ដល់បងប្អូនអាជីវករ អតិថិជ ក៏ដូចជាបងប្អូនប្រជាពលរដ្ឋដែលចេញចូល ក្នុងទីតាំងផ្សារខាងលើ។ នេះបើតាមសេចក្តីជូនដំណឹងរបស់រដ្ឋបាលខណ្ឌឫស្សីកែវ នៅថ្ងៃទី២២ ខែមេសា ឆ្នាំ២០២១នេះ។

អភិបាលខណ្ឌឫស្សីកែវ លោក ជា ពិសី បានអំពាវនាវដល់បងប្អូនអាជីវករ សន្តិសុខ បុគ្គលិក កម្មករបម្រើការងារក្នុងផ្សារងិនអាន(ផ្សារទំនប់) បើមានអាការៈសង្ស័យ សូមប្រញ៉ាប់រួសរាន់ទៅយកសំណាក់ធ្វើតេស្តរកមេរោគ កូវីដ-១៩ ជាបន្ទាន់ ស្ថិតនៅមជ្ឈមណ្ឌលម៉ូឌែន៥ ក្នុងសង្កាត់ឫស្សីកែវ ខណ្ឌឫស្សីកែវ៕